中環出更：義賣慈善曲奇有奇遇
一年一度嘅伸手助人協會曲奇義賣活動尋日喺某商場舉行亮燈儀式，呢項活動已經舉辦咗三十年，為咗隆重其事，特別邀請特首夫人梁唐青儀做主禮嘉賓。梁太致辭時話，佢係今年首次以協會贊助人身份出席，又話要同協會同呢個活動講生日快樂，又呼籲大家起碼至少買三十塊曲奇餅喎！
袁彌明經過 即幫襯兩盒
同場出席活動嘅仲有立法會議員陳志全（慢必）同陳家洛，佢哋落足嘴頭呼籲市民支持，仲身體力行幫手義賣曲奇。就喺陳家洛義賣曲奇期間有奇遇，突然遇到前港姐袁彌明（Erica），Erica亦二話不說用咗一百元買咗原價只係七十元嘅兩盒曲奇，之後同長者仲互祝身體健康。
至於Erica點解突然會出現呢？原來佢係嚟接慢必走，然後一齊出席另一項活動，好在慢必之前宣布「出櫃」，否則呢對金童玉女經常出雙入對，想唔傳緋聞都難喇！
卓妮