中環出更：自製陶器佳餚 余健志有兩手
飲食達人余健志（Jacky Yu）人氣爆燈，佢設計嘅菜式不但創意無限，原來佢對陶藝創作都有一手。原先從事廣告創作嘅Jacky，於投身飲食業之前就發覺陶藝係一項講求創意嘅活動，佢覺得若巧手佳餚配以精美嘅陶藝器皿，就如畫龍點睛，喺視覺效果上更上層樓，佢於是拜師學陶藝，如今令佢嘅陶藝跟廚藝相輔相成，猶如牡丹綠葉。
一如廚藝創作，Jacky嘅陶藝作品盡顯佢嘅心思同品味。正因為佢愛以實用器皿為創作題材，所以佢屋企嘅杯盤碗碟都充滿獨特個性同品味，親友觀之無不擊節讚賞。Jacky亦曾經與陶藝導師製作一批餐具器皿供旗下菜館使用，食客亦都讚嘆不已。不過，好評如潮背後，亦為Jacky帶來煩惱。
Jacky話，由於手製陶藝器皿並非大量生產，打爛一件就少一件，為咗好好保存，只能用人手清洗。不過，Jacky始料不及嘅，係有客人要求帶走例如筷子座等物件以作留念，為免得失客人惟有忍痛割愛；佢又試過製作小花樽裝飾洗手間，但是旋即被人順手牽羊。Jacky後來都無奈改用工業生產嘅陶瓷器具，而私伙手製嘅陶器就留番畀識貨嘅客人。
領悟欲速則不達道理
雖然飲食業嘅經營環境日趨艱巨，但Jacky一有閒餘，都會依構思製作獨一無二嘅陶藝作品。佢話陶藝呢種嗜好，令佢領悟欲速則不達嘅道理，例如要由一堆軟腍腍嘅塑土燒成堅硬嘅陶器，就要由手捏或拉胚開始，然後經過修胚及風乾，再到素燒及上釉等多個工序，耗時起碼兩至三星期，真係少一分耐性都唔得。況且陶藝製作嘅成功率並非百分百，隨時功虧一簣，所以心理上亦要豁達。
卓妮