港產官僚口口聲聲「以民為本」，如果你相信，咁就太傻太天真喇。嗱，社署設立長者生活津貼電話熱線，話方便老人家查詢喎，點知結果啱啱相反，電話打極都唔通，熱線變冷線，方便變不便，擺明糊弄長者啫！
本報連日收到唔少長者投訴，指呢條長津熱線黐晒線，根本無法接通。好似獨居長者鄭伯咁吖，本來想查詢係咪合資格申請長津，點知打咗三日電話都唔通，連留言服務都無，咁點算呢？鄭伯畀呢條長塞熱線搞到心情七上八落，津貼未攞到，先嚟一肚火。
嗱嗱嗱，港產官僚真係好混帳o架，長者打唔通熱線不特止，就算親自到辦公室查詢，官僚一樣闊佬懶理。唔少長者情急，湧到社會保障辦事處查詢，三十九個辦事處大部分被逼爆，但係社署依然未向前線員工發指引，搞到員工答非所問，好多長者白行一趟。你話喇，港產官僚究竟係幫長者吖，定係玩長者！
難為社署仲死雞撐飯蓋，話十條長津熱線自去年十月運作至今，總共接獲超過四萬個查詢喎，而上月二十五日向二十九萬長者寄出第一階段「自動轉換」通知書後，平均每日接獲六百多個查詢，當局已經增多五條熱線咁話。
唔使再死撐嘞，如果官老爺真係咁有效率，點解咁多長者打唔通電話呀？如果服務真係咁周全，點解咁多長者要湧去辦事處查詢呀？老實講，社署究竟係咪接獲咗四萬個電話查詢，真係令人懷疑有冇作大。退一步講吖，全港幾十萬老人家符合申請長津，設立十條熱線點夠呀？擺明係敷衍市民啦！
嗱，呢啲咪叫官僚囉。市民要求設立查詢熱線吖嘛，咪求其整幾條出嚟，交咗差就算。至於長者打唔打得通，就關人個關嘅喇！
咁講啦，敷衍塞責已經成為港府五十年不變嘅施政特色，長者打電話受折磨唔係第一次啦。呢，醫管局幾年前又係話方便長者喎，一刀切實施電話預約門診服務，點知方便長者又係變折磨長者，預約電話操作程序繁複到嘔，唔少老人家被玩殘，未預約到門診時間，已經病多幾錢重！
古人話：「為長者折枝，語人曰：我不能。是不為也，非不能也。」為長者設置查詢熱線，解答長者疑問，仲簡單過為長者折枝，咁都搞到唔湯唔水，甩甩漏漏，好明顯係不為也，非不能也。港產官僚得過且過，求求其其，乜嘢「穩中求變」，乜嘢「以民為本」，嘥氣啦！
長津熱線打唔通，玩殘長者無陰功。老吾老以及人之老吖，港產官僚快快諗辦法補救，如果唔係，小心畀雷劈呀！