立法會議員每日接收好多市民或業界求助或投訴，如果係爆大鑊嘢，電話被人call爆兼留言信箱滿埋都唔出奇。不過，漁農界議員何俊賢（高佬賢）就連冇乜特別事情發生嘅情況下都照樣被人call爆機，佢最高紀錄係一日收過三百多個來電，換言之平均每個鐘收到超過十三個電話，數目之多認真唔講得笑。
究竟點解高佬賢會一日收到三百多個來電咁多呢？有熟悉業界中人話，漁農界中人出名快人快語，諗到有乜就會第一時間打畀高佬賢，但係佢有時要開會未必可以接到電話，起初業界對佢未有即時接聽電話都有啲唔慣，但後來慢慢熟悉佢嘅處事模式，之後佢就再冇試過一日收到咁多個call喇！
同樣因為角色轉換令接電話方式要變嘅，仲有新任古物諮詢委員會主席林筱魯。林筱魯話，以前對於冇來電顯示或唔識嘅電話，未必會個個都接聽，但做咗古諮會主席後，基本上邊個電話打來都會接聽，唔知第時再處理具爭議嘅保育項目時，保育團體會否動員打畀林筱魯爭取支持呢？