政情：梁永祥：我係基層出身
啱啱新上任僱員再培訓局主席嘅梁永祥（William）來頭不小，曾經擔任恒生銀行執董，依家又係新鴻基金融嘅行政總裁，而且公職一籮籮。不過，為咗同廣大打工仔拉近距離，佢尋日同傳媒茶敍時就自貶身價，話自己唔係「貴族」，只係基層出身，仲要半工讀先讀完大學添！
William透露，佢爸爸生前係油麻地小輪（現稱香港小輪）嘅船長，所以佢細個時就經常有機會去遊船河，就係坐爸爸駕駛嘅小輪，由深水埗去中環，再由中環坐返去深水埗，成為當時夏天嘅最佳消暑活動。
明白市民對工作需求
正因為出身基層，William話讀中學時已經要搵兼職供自己讀書，到讀完大學後亦都要負責供養細佬妹入大學，所以佢係好明白基層對一份工嘅需求同期望，自己都認為僱員再培訓局嘅工作係好有意義，希望可以幫到基層人士向上流動。