政情：黃錦星婦女節破例
環境局局長黃錦星（KS）嘅慳電能耐，佢認第二，相信冇人敢認第一，但原來佢連飲食減碳方面都好有心得。KS尋日同記者聚會時話，平時食飯好少揀用「燉」嘅方式煮食物，因為火力猛又煮得耐唔夠慳喎。點知呢頭講完，佢一攞起餐牌就發現其中一道菜係燉湯，連忙大喊「唔記得審閱」，身旁嘅新聞官惟有打圓場話，三八婦女節就破例一次啦！
KS眨吓眼上任已有八個月，既要改善空氣，又要諗計減少垃圾廢物，仲要同兩間電力公司就電費拉鋸，工作密密麻麻，有時逼住將工作帶返屋企，但亦因此而同女兒見面多咗。佢話未做官前係學者身份，難免要出席講座、晚會或同建築業界交流吓，但依家就要專心一意做好局長，反而多咗「識得返屋企」。
情人節專登放假陪老婆
不過，老婆點都想見多啲老公，KS就自爆話，好多環團活動都係周末舉行，所以佢依家幾乎連周六、日都冇假放，更加唔好講放長假喇。雖然KS上任至今未放過長假，但佢點都要喺農曆年初五放番一日假，皆因嗰日係二月十四日情人節，佢就同老婆大人去咗大澳拍拖行山，浪唔浪漫就唔知喇，但總算補番數啦！