政情:城大起農場唔使靠政府

浸會大學為爭取九龍塘前李惠利學校地皮,上至校長陳新滋,下至數以百計大學生,都陷入一場苦戰。同樣位於九龍塘豪宅區嘅城市大學,咁啱亦正申請開辦獸醫學院,既需要校舍,又需要農場飼養動物供學生實驗之用,咁該校又使唔使問政府攞地,喺九龍塘建校舍起農場呢?城大校董會主席胡曉明(Herman)就好淡定話,城大靠自己嘅資源就搞得掂,唔使向政府伸大手板喎!

胡曉明透露已租新田農地

兩年前城大已向大學教育資助委員會申請開辦獸醫學院,不過被否決,校方準備充足後捲土重來,今年已再向教資會提出申請,教資會亦轉口風設立小組研究方案,勝算大好多。Herman透露話,城大已同一位地主租咗好大塊農地,塊地位於元朗新田,但問到租金幾多?面積幾大?佢就話冇資料喺手,唔係好清楚,總之唔會好似鄰居浸大咁樣,搶地搶到全城關注啦!

Herman喺去年十月接替特首梁振英(CY)出任城大校董會主席,佢嘅「梁粉」色彩濃厚,自然唔會為政府添煩添亂。不過,講真嗰句,今次城大自食其力搞掂香港最難搞嘅土地問題,算係夠晒誠意,相信為增加贏面都有些少幫助。據講城大開辦獸醫學院,已為軟硬件配套做好準備,除搵地設立農場飼養動物,供學生實驗用外,仲聘咗請本地同外地嘅專家教書。

講番浸大爭奪地皮風波,有知情人士爆料話,早前政府打算喺新蒲崗另撥一塊地皮,用作支持浸大起中醫教學醫院之用,但浸大突然態度劇變,堅持要用李惠利地皮,件事搞到官民爭地咁肉酸,唔知政府會唔會反口呢?不過,有輿論話浸大今次採取文革式抗爭行動,輸盡民心,如果最終爭輸咗,陳新滋要執包袱事小,浸大聲譽受損事大,到時真係唔知仲要搵邊個負責喇。

第一手消息請下載on.cc東方互動iPhone/iPad/Android/Windows Phone Apps