中環出更：政商獻策拯救本土產業
受惠於內地個人遊旅客及地產市道帶動，香港舖租有升冇跌，唔少政商界名人都慨嘆具本土特色嘅老店買少見少，紛紛向政府獻計，拯救本土特色產業。港區全國人大代表羅范椒芬尋日接受內地媒體訪問時坦言，因為迎合內地人奢侈消費需求，搞到成條街都係鐘錶店、珠寶店，但以前賣粥嘅小食店、具本土特色嘅商店、零食店都冇晒喇！
羅范椒芬：需更多購物點
羅太舉例話，好似喺銅鑼灣最受歡迎嘅旺區，業主點會將間舖以一萬元租畀一間麵包店，而唔收十萬元租畀一間鐘錶店呢？因為商人追求最大利益。佢建議，本港有需要提供更多購物點，迎合內地客需要，同時要保留本港嘅小區特色，滿足港人需要。不過，羅太就話自己冇興趣睇鐘錶同珠寶，亦買唔起奢侈品，有一隻錶就已經夠了，就連行街都可以減少。
施榮忻：適度發牌畀小販
菁英會榮譽主席施榮忻（Jaime）日前出席一個活動時亦都話，好希望政府諗計調控舖租，否則未來一至兩年內，好快出現「有舖冇人租」嘅現象。Jaime自言愛「掃街」，不時會到街邊篤魚蛋、牛雜、咖喱魷魚，所以好驚呢啲富有香港特色嘅小食失傳。
Jaime認為，唔係所有旅客來港都只係買名牌、化妝品，其實都想見識吓地道嘅飲食同文化。佢期盼政府唔好扼殺街邊檔，適度發牌畀小販，留番一線生存空間畀佢哋，例如協助年輕人發展小生意，建立本土特色產業，好似台灣特色景點之一嘅夜市咁，豐富旅遊業內容，提升軟實力。
資深時裝設計師鄧達智（William）感慨話，租金貴唔止趕絕小商戶，亦扼殺埋本地創意工業嘅生存空間。好似佢啱啱出道嘅年代，初出茅廬嘅設計師可以平平哋租間店舖，展示自己嘅創作，但呢個年代就要計得好清楚至敢開店。William講講吓，自爆本月底會喺中環開一間自家品牌服裝店，吓？咁佢咪好有信心賺到錢交貴租？佢解畫話，好彩佢遇到一位良心業主，以低於市價租金一半嘅友情價出租咋！
卓妮