樓價高昂租金貴，由始至終都係香港人最傷腦筋嘅沉痛問題。無處容身又唔想瞓天橋底嘅你要租屋住咩，每個月含辛茹苦賺嘅血汗錢冇咗一大截。若然你租舖經營小本生意，非常之咁對唔住，業主簡直就係一個未成親洞房嘅離婚配偶，惡到有權分你身家。業主分身家嘅方法好簡單，一睇到你生意興隆財源滾滾來，佢即刻見錢開眼瘋狂加租，動不動加租一倍甚至以上，將閣下賺到嘅收入蠶食一大筆。
喂，人哋做生意嗰個日捱夜捱先至搵到幾個錢，擁舖自重嗰個收租佬，居然五體不勤都可以悶聲發大財，你話係咪令人無名火起吖？真係好難怪香港人咁仇視地產霸權o架，搞到幾乎人人都係地產商嘅奴隸獸。
呢嗱嗱嗱，租金貴呢個問題，睇怕要將上環海味街徹底消滅，日後海味街不再聞到海味香。港鐵西港島線將於明年通車，導致區內樓價一再彈升，連帶舖租同樣水漲船高。喺海味街打滾幾十年嘅店主透露，由於不滿業主加租一倍，索性結束位於德輔道西嘅海味舖。
類似個案只係冰山一角咋，本報記者前往有參茸街之稱嘅永樂街同文咸東街，仲有德輔道西同文咸西街一帶嘅海味街巡視，發覺到處都係丟空嘅吉舖。海味舖紛紛撤出海味街，最主要就係一個原因，租金實在貴到頂唔順，利潤根本無法彌補向業主進貢嘅租金。假如海味舖老闆本身係業主，眼見放租圖利原來好搵過自己營營役役做生意，咁咪又一二三執笠大吉囉，理得個租客賣嘅係手錶定係鑽石，總之五體不勤都可以悶聲發大財。
除咗租金貴到離晒大譜之外，海味行業後繼無人都係一個關鍵。經營海味每日朝早八點就要開舖，夜晚六七點關舖之後仲要做會計埋數，接近十點先至返到屋企，咁嘅生活全年無休，農曆新年更加忙到一頭煙。今時今日港男港女嬌生慣養，下一代打死都唔願意繼承上一代嘅衣鉢。就係咁，海味街更加難以聞到海味香。
所以話啫，香港愈來愈唔似香港，乜都變晒味，乜都變晒質。你放假想去行街街咩，唔好意思，來來去去都係千篇一律嘅商場，見來見去都係熟口熟面嘅品牌。咁嘅情況就好比，食魚冇魚味，食雞冇雞味，食來食去都係索然無味。
唉，一日到黑都係官老爺養虎遺患，政策不斷向地產商傾斜吖嘛，卒之搞到小本經營者無法生存，一個二個淪為租務怪獸魔爪之下嘅陣亡冤魂。
老街索然無味，老店銷聲匿迹，剩下集體回憶，功夫茶想請教一下助紂為虐嘅官老爺，有冇少少覺得對唔住你老味呀？