驚蟄過後，桃花紅、梨花白、燕飛來，充滿希望的日子就要開始了！可惜一見前食物及衞生局局長周一鑊呢個廢官，剛下台短短八個月，竟然又獲特區政府垂青，翻閹掌平機會！仲要喺正四月一日愚人節正式履新！難怪有人說：以前，笑話都是編出來的，現在，笑話都在現實裏！
周一鑊掌食衞局時，八年任內一事無成，在公方面懶理雙非問題，令大批本地孕婦唔夠床位生仔，本地媽媽嗌晒救命，漠視公營醫院人手不足，搞到公立醫院前線醫護人員怨聲載道，好多人做到冇晒心機，而周一鑊主政期間，醫療失誤多到離奇。
再講啊，周一鑊更視法律如無物，遲遲唔肯清拆佢大宅內嘅僭建物！講開就把鬼火，佢出任食衞局局長時，轄下多次無理指控東方，每次均無功而退，致東方飽受滋擾；最離譜就係其他報紙刊同一則廣告，雖然都被指違反《不良醫藥廣告條例》，惟衞生署竟只檢控《太陽報》，並罰款六千元！而且如此大細超唔止一次，你話喇，咁嘅廢官最愛玩針對，撩是鬥非，由佢執掌平機會，係唔係愚人節最愚弄全港市民嘅笑話？
內地有微博話：當今最惡心的幾件事：一、聽貪官污吏做廉政報告；二、聽愛吃野味者說要保護動物；三、聽獻媚權勢的人說要講氣節；四、聽表哥說錶都是親戚送的；五、聽官二代們說奮鬥全靠自己。老朽亦有幾件惡心事：一、聽一個處事最唔公道嘅廢官做平機報告；二、聽不守法嘅廢柴話要保護公平公正；三、聽無德無能嘅一鑊泡要市民忘記其背景，可惜佢劣迹斑斑，市民一息尚存都忘不了他的鑊鑊新鮮鑊鑊甘！
老朽只能說特區政府果真鬧人才荒，翻閹一個對人權識見有限嘅廢官掌平機會，由四月一日起平機會嘅Logo就係一隻黑鑊！黑足三年，香港點會有運行！