西貢區議員方國珊（哪吒）早前因違規掛橫額問題，先後被西貢民政事務專員同其他區議員譴責，點知同屬西貢區議員嘅新民主同盟立法會議員范國威（Gary），近日就將呢個戰場延續去到社交網站上面。
Gary引述西貢區議會紀錄，話去年四月至今，哪吒總共有一百七十八次違規懸掛橫額、直幡同擺放易拉架嘅紀錄，叫哪吒唔好賊喊捉賊之餘，又鬧爆哪吒同某協會一樣亂掛橫額，都係拜政府縱容所賜。
忍唔住氣嘅哪吒就喺三個鐘頭之後高調反駁Gary嘅指控，話Gary自己都有四十七次違規擺放宣傳品嘅紀錄，亦都係賊喊捉賊。
佢又駁斥話自己同某協會互不相識，批評Gary咁講係想混淆視聽，手法唔得光明磊落，反指Gary經常同民建聯「吱吱噚」，咁係咪就可以當Gary係隱形左派、偽泛民呢？
哪吒鬧爆Gary與其喺度煽風點火，倒不如做番多啲實事，唔好喺立法會選舉後經常缺席區議會會議。如果兩方爭持不下，睇嚟呢場罵戰將會沒完沒了。