政情：區詠芷焗住「撻朵」
有「環保女神」之稱嘅區詠芷（Michelle），離開地球之友加入政府做環境局政治助理，由民間監察環保政策角色變成有份制訂政策，自不然喺生活細節上都要身體力行實踐環保。Michelle話，好多西餐廳都會提供餐包，但就算客人冇食過，餐廳都會丟棄，所以佢有兩招應對，一係事前講明唔要餐包，一係就帶膠盒打包拎走，喺翌日當早餐食。
環保恐被當貪心
不過，原來Michelle呢個避免浪費食物嘅做法，有時都會遇到阻力，佢話有次去一間西餐廳，正準備將食剩嘅餐包打包時，有餐廳職員就講到明唔准拎走，仲好似搞到佢好貪心咁。事後Michelle惟有表明自己係環境局官員嘅身份，要以身作則避免浪費食物，呢間餐廳嘅職員先破例畀佢打包啲餐包拎走。
Michelle入得官場呢個「熱廚房」，自不然工作環境同生活模式都會有啲改變，Michelle話，佢依家基本上做嘢會做到八點左右先離開，難以好似以前咁返屋企煮飯，所以較早放工嘅老公就負責返屋企煮飯，佢就食完飯後負責洗碗喎。