政情：黃碧嬌被屈呼寃
因道路或渠務工程而設置臨時巴士站，本來係好平常嘅事，但大埔區區議員黃碧嬌尋日就因此被投訴以權謀私。尋日我哋收到一位街坊投訴，話廣福道一間美容店以影響風水為由，報警要求將門前嘅臨時巴士站移開。該名街坊自稱目睹事件經過，更指該美容店舖位嘅業主正是黃碧嬌，懷疑佢利用區議員身份浪費警力及擅改交通措施喎。
搬臨時巴士站惹事端
我哋就事件向黃碧嬌了解，佢就大呼冤枉話自己根本唔係有關舖位嘅業主，亦同間舖頭完全冇關係。佢解釋，尋日上午路經廣福道美容店外時，巧遇相識嘅九巴區長與渠務工程公司負責人商討緊搬巴士站嘅事，仲想喺路邊畫雙黃線。佢記得嗰度本來係上落客貨區，所以走過去提醒相關人士唔好畫雙黃線，點知就畀嗰位街坊誤會咗。
黃碧嬌話，自己本來好心幫忙，點知反捲入無謂嘅紛爭，認真無奈。佢仲話，自己唔係大埔墟選區嘅區議員，之前根本唔知道上址巴士站搬遷一事，後來打電話向該區區議員李國英了解，點知連對方都唔知有呢件事，直斥工程公司進行工程之前冇諮詢區議會意見。