施政報告提出撥款一億元畀每個區議會，大搞亮點工程提升生活質素，十八區入面大部分區議會都傾得七七八八，但其中東區及離島區議會特別多元化，各有超過十項建議，到底邊個建議項目能夠最終勝出，月底可能會揭盅。
東區區議會有四十一位議員，卻有數十個項目角逐一億元撥款，皆因佢哋好民主，除諮詢區議員意見外，仲公開問埋各分區委員會、街坊福利事務促進會等團體嘅意見。有人建議起文化廣場、又有人提議推廣廚餘處理，連安裝電梯同增設穿梭小巴都立項，怪不得咁多建議喇，所以區議會要先投票選出五個項目，之後再討論，估計三月底拍板冇問題喎。
另外，離島區就有十三個建議項目，既有人建議喺大澳興建社區會堂，亦有人希望起單車徑、擴建長洲渡輪碼頭，甚至喺東涌設立小販墟等，總之每位議員都想將一億元放喺自己嗰區。聽聞西貢民政事務專員好頭痛，要想辦法擺平各方勢力，早前民政署已經派人出口術，同班區議員講明工程一旦涉及移山填海，就要過城規會等部門，好難批，據聞已成功剔走四項工程，當中包括喺北大嶼山起單車徑，餘下建議就要再開兩次會篩選喇。