政情：「閹官」周一鑊撼頭埋牆
平等機會委員會主席遴選過程一直都被民間團體鬧爆係黑箱作業，上星期宣布委任「廢官」食物及衞生局前局長周一嶽（周一鑊）出任平機會主席，不但進一步深化平機會係「高官退休俱樂部」嘅形象，翻閹「平機零經驗」嘅周一鑊亦實在反智。據聞獵頭公司曾經向其他前高官招手，但有關人士為免有利益衝突而婉拒，反而周一鑊就不甘寂寞撼頭埋牆，他日頭破血流都與人無尤。
周一鑊四月一日愚人節履新做平機會主席，呢份愚人節禮物認真大鑊。自從主席遴選委員會去年九月成立以來，傳出嘅主席人選不勝其數，包括政制及內地事務局前副局長黃靜文、香港失明人協進會會長莊陳有等，但最後竟然由周一鑊僅以少許復康服務工作經驗同少少婦女事務委員會嘅經驗跑出，實在令人難以置信。
周一鑊話去年十二月有獵頭公司向佢招手，佢開始睇平機會嘅工作，之後覺得香港「呢段時間需要保障人權」，咁就接受邀請喇。佢日前喺記招上強調，唔知自己係第幾輪申請，但據聞獵頭公司喺向佢招手之前，亦曾經向其他較有經驗嘅前高官埋手，而呢位前高官候選人就係黃靜文。
黃靜文醒目拒接燙手山芋
黃靜文喺政制及內地事務局做副局長時主責人權事宜，包括反歧視條例，期間同平機會有唔少接觸。聽聞早喺去年十一月，就有獵頭公司向黃靜文招手，不過佢經過深思熟慮後最終都係婉拒邀請，原因係自己太熟悉政府運作，喺前官員嘅角色上，再任平機會主席好似唔係太恰當。
黃靜文所講嘅「唔係太恰當」，相比起周一鑊一句「我嘅經驗同背景係無法子改變或者刪除」，二人政治智慧高下立見，而周一鑊嘅厚面皮度，真係唔使度都知。不過，既然大局已定，用番周一鑊嘅說話，由四月一日開始，香港市民亦只能無奈「當」佢係平機會主席，而他日若然發生同佢前局長身份有衝突嘅風波，就真係自作孽喇！