中環出更：謝偉銓遊台抵玩過香港
新正頭不少議員都外遊充電，好似立法會建築、測量及都市規劃界議員謝偉銓（Tony）就同太太及囡囡Mimi暢遊台北，佢大讚行程豐富，又坐纜車，又掃街邊美食，大飽口福，最重要係消費平過香港喎。
咪睇Tony身形瘦削，原來好擦得，佢帶隊遊著名嘅饒河夜市，狂擦燒香腸、大雞扒、燒番薯、烚花生，再打埋邊爐，食到無停口。Tony慨嘆香港舖租炒到貴晒，街邊特色小食買少見少。醫完肚，佢哋又試坐貓空纜車，來回車費只係約三十元，抵玩到極。
冧莊專資會會長
返到香港，Tony又再投入工作，身兼香港專業及資深行政人員協會（專資會）會長嘅佢，日前成功連任，佢笑言做一年未夠喉，所以要冧莊。此外，行政會議成員羅范椒芬都重返專資會做副會長，睇嚟專資會嘅「梁粉」色彩，真係愈來愈重喎。
卓妮