身兼行政會議成員嘅港區全國人大代表陳智思（Bernard），日前跟大隊上北京開會，雖然人大開會出晒名時間長，但Bernard識得忙裏偷閒，尋日喺社交網站上載一張喺人民大會堂內拍攝嘅照片，相中嘅Bernard坐喺前方，而後方就有位着軍官服飾嘅靚女，一齊望住鏡頭微笑，而呢位靚女就係中國首位女太空人劉洋。劉洋今次係隨解放軍代表團參加全國人大會議，Bernard竟然可以喺茫茫人海中見到劉洋，仲把握機會上前同美人合照，話佢係劉洋嘅頭號粉絲都不為過。
（互聯網）