政情：有相為證：何「仁」洩私隱
議員辦事處係唔少街坊求助嘅地方，但身為立法會超級議員嘅民主黨何俊仁（鐵頭仁），其辦事處處理街坊投訴個案嘅做法真係嚇親人。有讀者向本報投訴，話見到鐵頭仁位於屯門啟豐商場嘅辦事處張貼咗一張「個案記錄表」，求助街坊嘅全名、手提電話號碼同求助個案內容完全冇遮冇掩，透過職員嘅筆記仲可以估到投訴人喺大興體育館巴士站被冇戴口罩嘅狗隻咬傷。
呢位讀者批評鐵頭仁辦事處外洩市民個人資料做法太疏忽，仲話︰「如果畀被投訴人見到，（投訴人）被人騷擾咁點算？」咁搞法，街坊搵佢幫手前真係要諗清楚先。不過，鐵頭仁就話唔知有件咁嘅事，而佢嘅辦事處職員就解釋，因為同事環保，所以用記錄紙背面寫低工作情況貼喺櫥窗。職員又話，啲個人資料同記錄表個案內容係無關嘅，只係咁啱寫埋一齊，佢哋以後會小心處理個人資料喎。