以色列過去培育出唔少諾貝爾獎得主，中文大學校長沈祖堯前日喺網誌發表一篇名為「如何培養年輕一代」嘅文章，分享佢去年十月到訪以色列嘅感想，藉此學習培養年輕一輩成為敢於創新、堅忍不拔又勇於承擔嘅人，希望香港嘅家長同老師能夠作為借鑑，並且去反思教育孩子嘅方法。
沈祖堯話，有關旅程接觸過當地唔同階層同年齡嘅人，有特拉維夫大學校長及教授，亦有的士司機、餐廳侍應同喺海灘玩滾軸溜冰嘅年輕人，又參觀咗一間初創企業，以及感受各種大自然氣息。佢返港之後，閱讀咗特拉維夫大學校長送畀佢嘅書，名為《新創企業之國：以色列經濟奇蹟的啟示》，學到幾點有關以色列如何培育國民及其教育制度嘅事。
沈校長話，以色列國民慣於提出問題、提出假設同尋找答案，從來唔會為問咗啲愚蠢嘅問題而道歉，成功之道就係善於培養好奇、堅毅、胸襟廣闊、實事求是、勇於承擔、懂得溝通聯繫嘅人。
反觀香港，佢質疑香港教育有缺失，父母太過保護孩子，學術課程太着重狹隘嘅專科知識，忽略跨學科訓練等，希望大家改弦易轍，好好反省喎。