政情：侯志強去玩攞正牌
好多住喺北區一帶嘅鄉事派，都喜歡北上消遣輕鬆吓，一來交通夠方便，二來私隱度亦較高，可以玩得盡興玩得放。上水鄉事委員會主席侯志強尋日同傳媒聚會時，突然自爆自己都鍾意北上唱K，而且次次都唱通宵，唔過夜都唔返歸，仲不諱言有美女陪伴添！最奇係佢話太太一啲都唔介意，反而驚佢一個人北上會被賊人打劫，最好搵多啲人陪伴北上喎。
侯志強講北上講到興起，話北上唱Ｋ輕鬆吓係最大樂趣，因為佢唔係「同志」，有女仔陪唱都好正常，而且唔靚嘅女仔都冇資格陪佢喎，但係咪陪唱咁簡單，咁就得佢自己先至知喇。
「最早返屋企嘅男人」
侯志強仲自稱係「全香港最早返屋企嘅男人」，因為佢唱到第二朝七點就返屋企，仲夠時間叫老婆起身添。佢講到好似攞正牌去玩咁，都唔知真定假。
其實侯志強做主席都唔係一味顧住玩，好似近期佢都籌咗五百萬元，修葺同翻新河上鄉一間洪聖古廟同觀音廟，三月廿四日仲會大開七百圍盆菜益鄉里，到時有大戲睇，又有搶花炮等慶祝活動，總之咩都有得玩。