政情：陳振聰受洗「重生」
喺爭產案中終極敗訴嘅商人陳振聰日前公開承認信咗耶穌，本來安排下月喺林以諾牧師間教會受浸，點知佢為怕受到騷擾，結果浸禮提前於前晚舉行，老婆仔女同七十幾個親友、教友都獲邀出席。當晚陳振聰接受電台訪問時話，受浸仲緊張過結婚，感覺超興奮，唯一遺憾係浸禮改期，令身在溫哥華留學嘅大仔訂唔切機票返港見證佢「重生」一刻，惟有將浸禮嘅相同影片傳畀囝囝睇補數。
太太感動到喊
當晚陳振聰喺青衣一間教會包場舉行浸禮，全程約一個鐘。為怕有人生事，教會防衞都幾嚴密，全部來賓都係由陳振聰親自邀請，仲要核對過名單方可內進。一身西裝打扮嘅陳振聰，以招牌四萬嘅笑容迎接親友，太太譚妙清及仔女坐喺最前排座位，當佢受洗嘅時候，譚妙清不停咁舉機幫老公影相留念，仲感動到眼濕濕，不時攬住身邊嘅細仔。
譚妙清話，老公信主之前好少理屋企，依家改變咗好多，個人冇咁忟憎，靜咗又開心咗，成個家和諧咗。問到覺得老公對佢有冇好啲？佢就話：「可能我要求高，進步咗少少啦！」