政情：人大政協唔使兩頭騰
人大政協兩會每年都同立法會大會撞到應一應，過去身兼人大政協嘅立法會議員都要飛上飛落來回京港好頻撲，而且仲要使多筆機票開支。不過，自去年兩會開始，立法會就好巧妙安排三月份首兩個星期三大會休會，到今年兩會亦唔例外，同樣休會兩星期「讓路」，恐怕此舉已經成為慣例。其實身兼人大政協嘅議員只有十三人，但就要其餘五十七位議員唔開會，簡直係不顧民生。
還記得財爺曾俊華（鬍鬚曾）前年發表預算案後，紓困措施唔到位搞到全城嘩然，事後要向市民派發六千元補鑊，而當年又曾出現一個情節，因為十多名身兼人大政協嘅建制派議員上京開兩會，喺泛民主派聯手反對下，破天荒否決政府六百多億元臨時撥款申請，即大約相等於首三個月政府開支臨時撥款議案，令到當時十六萬公務員隨時「冇糧出」，四十多萬綜援戶「冇飯開」等危機。
有政黨斥不公平
雖然港府同立法會最終共同解決呢個潛在憲制危機，但俗語有話「見過鬼都怕黑」，此後要求立法會大會「讓路」畀人大政協兩會嘅呼聲有增無減，去年立法會率先巧妙安排三月首兩個星期冇大會，及至去年九月立法會選舉後，本身係人大嘅體育、演藝、文化及出版界議員馬逢國更身先士卒，講到明立法會應該考慮喺全國會議時迴避，方便大家聚焦國家議題喎。
馬逢國呢番言論言猶在耳，按照常理尋日立法會應該要開大會，當然因為兩會關係，一早就講定唔開啦，而下周三亦都休會，呢兩星期只有零星事務委員會舉行，變相令十多名身兼人大政協議員，唔使再好似早年咁要做「空中飛人」。照咁睇，立法會讓路人大政協兩會疑似成慣例，有政黨中人批評，既然人大政協講到上京開會咁重要，當初為何要選立法會呢？
不過，立法會可以無喇喇安排休會兩星期遷就北京兩會，或多或少同泛民主派唔爭氣有關，事關佢哋爭唔到各大事務委員會正副主席嘅話事權，咁咪被建制派操控晒啲開會時間囉！