中環出更：黃敏華有信心揚威打吡
信和置業太子女黃敏華（Nikki）名下愛駒「連利多」，日前獲選出戰下星期日沙田馬場舉行嘅年度香港打吡大賽。Nikki尋日出席賽事發布會時，被問到有冇信心成為首位勝出打吡賽嘅女馬主，佢謙稱話愛駒能夠參與賽事，已經感到好榮幸，但卓妮見佢一副胸有成竹嘅模樣，加上愛駒往績佳，睇嚟有望打破呢個紀錄。
愛駒態勇 四戰奪兩冠
Nikki話，「連利多」係由爸爸黃志祥親自選購，購買時候目標已經好明確，就係為咗迎戰打吡賽。黃志祥名下駿駒多不勝數，揀馬眼光當然有番咁上下啦！Nikki自幼已經鍾情於騎馬運動，對馬匹產生咗濃厚感情，做咗馬主之後，更加經常去馬廐探望愛駒添！
已育有一歲愛兒嘅Nikki話，自從做咗媽媽之後忙住湊Ｂ，迫不得已暫停騎馬兩年，佢話遲啲時間許可嘅話，一定會重拾馬鞭喎！講番佢匹「連利多」，係來自愛爾蘭嘅四歲自購馬，今年初首次出賽就爆冷跑出，出戰僅四次就已經兩度奪冠，確係狀態大勇。