中環出更：吹洞簫唱南音 盧偉國與眾同樂
每月第一個周末，香港公園內嘅樂茶軒都會舉行南音粵韻音樂茶敍，不過啱啱過去嘅周末，樂茶軒除咗邀請到地水南音師娘唐小燕到場演唱南音歌曲外，仲請咗音樂好手、工程界立法會議員盧偉國（WK）客串伴奏。唐老師歲半時因患痲疹而失明，小時演唱粵曲和流行曲，幾年前先開始唱地水南音，其演繹與感染力令人嘆為觀止。
音樂茶敍開始時，WK先聯同其他幾位同道中人為唐小燕伴奏，大家分別彈奏古箏、椰胡及秦琴，而WK就負責吹佢拿手嘅洞簫。之後WK手執拍板演唱一首《周邦彥床底嘆五更》，故事講述宋代才子周邦彥看望汴京名妓李師師，因聖駕突然來臨，周邦彥被迫躲藏床底度過一夜，曲詞諧趣，字正腔圓，聽得台下觀眾會心微笑。
難得忙裏偷閒
WK話，入咗立法會後公務繁忙，冇乜時間玩樂器，今次抽到時間參加音樂茶敍，實在難得。佢又話，雖然南音有固定規律，但就唔一定要有固定組合，好多時大家都會「聽聲追聲」，即興決定點樣合奏。外界普遍以為南音歌曲多數抒發個人嘅坎坷遭遇同離愁別緒，例如《客途秋恨》就抒發對情人嘅思念之情，總係離不開悲涼傷感嘅感覺，但WK話南音都有詼諧輕快嘅一面。
樂茶軒東主葉榮枝就話，多年前已經開始喺旗下茶室構思舉辦音樂茶敍，等志同道合嘅音樂愛好者可以有機會齊集交流南音經。
布置得古色古香嘅茶室亦擺放唔同年代嘅茶壺同品茶工具，等慕名而來嘅知音人喺呷茶嘅同時，又可以側耳細聽古典樂曲，最重要係可以優哉游哉地過一個愉快嘅周末。
卓妮