財政司司長曾俊華年薪四百萬元，高過美國總統奧巴馬，竟然話自己係中產，到底係乜嘢意思呢？有人話佢不知民間疾苦，有人話佢不食人間煙火。至於功夫茶咯喎，就會認為鬍鬚曾的而且確係一個理財不擅嘅守財奴，明明大把錢都唔知點用，可悲可恨。
呢嗱嗱嗱，因乜事幹庫房水浸，財政儲備高達七千三百四十億元，最新一份財政預算案仍然唔去慷慨解囊，死都唔肯大大方方開倉濟世呢？點解派糖搞到愈派愈縮？道理其實好顯淺，曾司長雖然有好多錢可以用，不過判斷能力好有問題嘅佢覺得「庫房都係中產」，所以咪好似慳家小媳婦咁樣左度右度囉，即使有錢買鮑魚，結果都係買鹹魚，搞到成家人冇啖好食。
曾俊華出席電台節目嘅時候諸多辯駁，話如果要為博取掌聲而亂用公帑，將會禍延下一代喎。佢又強調香港人「重視個人發展機會，希望自食其力」，暗示市民毋須政府協助。對於咁唔識得體恤民情嘅官腔言論，其他有識之士梗係唔認同啦，議員、學者、中小企、民間團體甚至為特首梁振英助選嘅梁粉，都批評佢理財哲學過分審慎，欠缺長遠承擔，有人不留情面咁話「唔需要呢個中產人士做掌櫃」。
「東方報業民意調查」顯示，對於預算案錄得六百幾億盈餘，但只提出三百三十億元一次性紓困措施，三成一受訪者感到失望，認為紓困措施杯水車薪；兩成八覺得無助市民紓緩通脹壓力；兩成七指摘曾俊華敷衍市民，漠視民困。
扶貧方面又點睇呢？預算案建議向關愛基金注資一百五十億元協助N無人士，四成受訪者批評當局冇善用盈餘以長遠措施解決結構性問題；兩成三覺得N無人士無法即時受惠；兩成二直斥未能發揮具體社會效用。
咁又實在難怪市民唔收貨o架，紓困措施一味炒冷飯，來來去去就係退稅同埋寬免差餉等等，而且退稅更加由上次嘅一萬二千元減至一萬元，納稅人唔耍手擰頭就奇啦。既然支援中產嘅紓困措施縮水，三成二受訪者狠批預算案針對中產福利措施欠奉；三成一直斥預算案倒退；一成八不滿稅務政策極之保守。
唉，諗落真係十分可悲，香港由一個自稱中產嘅財政司司長去打理幾千億儲備，情況就好比一隻中學雞去擔當一間上市公司嘅CEO。大家試想想，中學雞識得向股東派發合理嘅紅利咩？中學雞嘅理財哲學就係死都攬住個豬仔錢罌，目光短淺咪變咗出手低囉！
照咁講，香港人重視個人發展機會，希望自食其力，其實係被守財奴政府逼出來o架咋！