政情：收料站：王浩賢「高攀」唔起劉慧卿
聯合國人權事務委員會今個月就《公民權利及政治權利公約》喺瑞士日內瓦召開會議，例牌上陣嘅除咗民主黨主席劉慧卿，民陣亦會就本港警權問題首次派代表出席。代表民陣到當地發聲嘅警權關注組召集人王浩賢笑稱，冇能力同劉慧卿並肩出征，皆因是次日內瓦之旅相當「重皮」，冇閒錢「升呢」同劉慧卿一齊住酒店喇！
警方拘捕及檢控示威者數字近年屢創新高，民陣特別就本港警權問題向委員會提交報告，內容除咗質疑警方以政治目的及選擇性檢控示威者及濫用武力阻礙示威進行外，亦會反映有年輕示威者因襲警被重判入更生中心接受感化嘅憂慮，希望藉是次「告狀」引起聯合國注意。
王浩賢笑言今次旅費除靠民陣籌得嘅血汗錢外，自己亦要掏荷包補貼，自嘲「節儉」上陣嘅佢只負擔得起當地青年旅館四人房租金，完成工作後第二日更要即刻飛返香港。