財政司司長曾俊華（鬍鬚曾）早前發表嘅財政預算案毀多於譽，未見有針對性措施幫納稅最多嘅中產人士，原本批評質疑喺香港社會都係平常事，只要鬍鬚曾肯虛心聽吓意見，有則改之無則加勉就可以，殊不知鬍鬚曾疑似過咗海就係神仙，淨係識獨沽一味為預算案辯護，好似尋日又發表網誌自圓其說，明眼人都睇得出佢好似塞住隻耳仔行街咁，視坊間各種意見如無物，更甚者係擺出一副為大家着想嘅「好官自居」模樣，睇怕廣大市民尤其係中產見到呢類自以為是嘅官員，都係自求多福先係上策！
