政情：郭偉強換鏡扮老成
早前立法會開會時，會議廳內突然多咗個中年議員，睇真啲原來係勞工界郭偉強，但年僅三十四歲嘅佢並唔係工作量大捱到殘，而係換咗眼鏡而變得老成咗十年。郭偉強話，之前佢戴開黑色粗膠框眼鏡，但有日突然覺得個眼鏡太重，於是就攞番六年前嘅無框眼鏡出嚟戴，話貪個眼鏡輕啲冇咁辛苦喎。
郭偉強又話，當年佢就係戴住呢副無框眼鏡去選東區區議會，當時啲街坊大讚佢個樣老成又得體，覺得佢相當可靠所以選擇投票畀佢喎。佢又講笑話，六年前戴呢副眼鏡都覺得自己老積，但至今年紀都有番咁上下喇，戴番副一模一樣嘅眼鏡應該差唔多。
台北甜蜜度歲
喺啱啱過咗去嘅農曆新年，郭偉強同拍拖多年嘅女友去咗台北玩幾日兼慶祝情人節。情人節當晚，佢仲特別去101大樓嘅頂樓餐廳訂定位同女友喺燭光晚餐下撐枱腳，女友見佢咁有誠意，梗係心都甜埋啦！