政情：獲英祿接見 董耀中勁興奮
泰國首位女總理英祿（Yingluck Shinawatra）日前旋風式訪港兩日，原來佢期間曾經與一班香港旅遊業界代表會面。旅遊業議會總幹事董耀中坦言，英祿身為一國元首，竟然會撥冗接見佢哋，令佢哋受寵若驚，興奮莫名。
阿董憶述，呢次會面由英祿主動提出，香港泰國旅遊局穿針引線，本港十幾間大型旅行社包括東瀛遊、康泰、新華、永安、星晨、專業旅運等都有代表出席，當日早上喺港島一間酒店同英祿交談四十五分鐘。
任期將滿 疑想encore
佢話英祿接見業界嘅目的，係想了解吓本港旅遊業界對泰國嘅睇法，希望推動更多港人遊泰。阿董話，今次會面可謂史無前例，標誌住泰國對香港嘅高度重視。佢大讚英祿作風親切，靜心聆聽，更承諾會盡快跟進問題。
在任總幹事十六年嘅阿董，喺入旅議會前曾任航空公司高層，佢大爆當年考慮跳槽時幾經掙扎，去過黃大仙求籤、搵高人睇相批命，最後都係決定轉換新環境。阿董任期將於年底屆滿，六十三歲嘅佢笑稱自己仲後生，願意繼續貢獻業界，睇嚟仲想encore喎。