政情：信耶穌一年 陳振聰改名Peter
爭產不成搞到官非纏身嘅陳振聰忽然信耶穌一年後，四月準備受洗，正式成為神嘅兒女，佢近日發表「救恩見證」，慨嘆昔日沉迷風水賺取金錢財富，以為好靈驗，其實係中咗魔鬼嘅引誘。佢又大嘆「財富是虛幻」，聲言要做「新造的人」，呼籲大家以後喺街上見到佢，稱呼佢做Peter喎。
接聖經一刻似中風
身世傳奇嘅陳振聰，信主經過都傳奇過人。佢話，去年三月家中司機Henry辭職時送咗本聖經畀佢，接過一刻，雙手好似中風般麻痹。後來經介紹認識林以諾牧師，定期返教會聽道，估唔到教友對佢好包容。有次，佢又主動參加一位來自非洲牧師嘅布道會，感動到跪喺地上成粒鐘，該牧師事後話佢知：「上帝已除去你嘅舊名，換上新名字Peter。」從此，教友都改口叫陳振聰做Peter。
回首過去，陳振聰直言人生曾經窮過、有錢過、捱過，亦歎過，但一切已成過去。雖然覺悟前非，但陳振聰因手持遺囑涉嫌偽造嘅官司，四月將喺高院開審，一旦敗訴，隨時淪為階下囚。面對官司，佢心情平靜，話唔怕坐監，因為佢已將自己，交託咗畀神。