中環出更：上海總會團拜 唐媽媽獻唱
已有三十年歷史嘅上海總會，日前喺中環自置會所舉行新春團拜，上海幫重量級人物齊出動，包括總會永遠名譽會長李和聲、現任理事長王緒亮、全國政協唐英年嘅母親唐尤淑圻等人。心情唔錯嘅唐媽媽，難得上台獻唱一曲《月亮代表我的心》，贏得熱烈掌聲。
車弘健為總會注入活力
當晚老中青齊集，有鐘錶業總會副主席高鼎國、通利琴行總裁李敬天、定做品牌「詩閣」後人張宗琪及常務理事方劉小梅等人。啱啱躋身全國政協嘅中華總商會副會長李德麟，同爸爸李和聲及囝囝李惟宏三代齊動員。總會剛成立青年組，擔任主任委員嘅車弘健預告，嚟緊將搞一連串活動，為總會注入活力。
王緒亮細數總會過去一年做嘅善事，其中已持續三十年嘅慈善項目「老人利是」，去年共籌得一百五十萬元，早前特登邀請二百間老人院代表到總會接受支票捐贈。佢話，蛇年要再接再厲，為有需要人士送暖。