中環出更：稻苗搞春茗 即興玩競飲
匯聚飲食界精英嘅「稻苗學會」趁新春喺尖沙咀一間酒樓搞春茗，餐飲界多位「大哥大」盡出，咁齊人，稻苗學會主席黃傑龍（Simon）即興嚟一場「競飲比賽」。為免飲得太多揸唔到車，佢提議將啤酒轉做Jolly Shandy，等大家飲得盡興。
競飲比賽分成三隊，Simon與安記海味董事總經理潘權輝及中華煤氣市務及營業總經理黃維安合組一隊，福苑集團主席盧浩宏、餐務管理協會主席楊位醒等人就組另一隊。競飲唔使五分鐘就分勝負，盧浩宏嗰隊得第二，Simon嗰隊得第三，即係包尾。雖然輸咗，但佢話友誼第一，志在開心。
身為叙福樓集團執董嘅Simon，早前帶隊去日本出席世界性飲食論壇，聽取日本Top 5生意拍檔分享必勝生意之道。佢大讚日本人喺經濟不景氣下夠晒搏，有食肆老闆喺零度下走上街派傳單招客，真係要寫個服字。開完會，唔少得品嘗地道刺身，無意中發現有壽司店賣鰻魚刺身，連同行嘅日本同事都話未見過。
趙祚豪「晒髀」影相
講番春茗，最high莫過於抽獎環節。越南餐廳「老趙」太子爺趙祚豪抽中巨型西班牙火腿，佢開心到高舉「隻髀」影相。點慶祝好？趙生話：「梗係切片食最正喇！」稍後會約埋三五知己分甘同味喎。
鴻福堂集團主席謝寶達（Donald）都係座上客。政府出「雙辣招」打擊樓市炒風，Donald話有助食肆傾租約，事關唔少旺舖經常要同地產公司拗手瓜，炒風沉寂後，對飲食業老闆有利。Donald笑言旗下分店多達九十間，幾乎日日要傾續租約，真係講價都講到口水乾。
卓妮