一年一度財政預算案又發表嘞，一如既往立法會之內呵欠連連，尊貴議員瞌眼瞓瞌到幾乎扯鼻鼾又流口水。無他嘅，一來港產政客水準低，二來財爺曾俊華發放悶氣嘅功力與日俱增，聽眾定力差少少都會出現儀態盡失嘅「冏樣症候群」。
唔理有幾眼瞓有幾悶，財政預算案始終係一份相當重要嘅官樣文章，關乎七百萬蟻民嘅旦夕禍福，今年鬍鬚曾到底噏咗乜乜東東呢？其中有一個動作值得大家深思，曾俊華話喎，向關愛基金再注資一百五十億元，推出新嘅扶貧項目。
對於呢一個動作，身兼扶貧委員會主席嘅政務司司長林鄭月娥就話嘞，感謝曾司長再注資一百五十億元以推出針對性措施協助「N無人士」，即係未能受惠於預算案提出紓緩措施嘅市民，例如冇入住公屋又冇申領綜援嘅窮苦大眾可以透過注資得到援助。
扶貧委員會轄下關愛基金專責小組主席羅致光同樣表示歡迎，佢認為關愛基金自從二○一一年成立以來，一直為經濟上有困難嘅市民提供援助，特別係未能受惠於現有社會安全網或政府短期紓困措施嘅群組。羅致光又話，今次注資令關愛基金有更大嘅靈活性，加大力度為弱勢社群提供支援。
好嘞，為扶貧而注資理論上係好事，有乜嘢值得大家深思呢？即係咁，大家睇番關愛基金原先嘅構思，本來係希望政府同商界各捐五十億元，湊夠一百億然後靠投資回報幫助安全網以外嘅基層市民。問題係，商界嘅捐款居然爛尾，湊來湊去都湊唔夠數。今次政府再注資一百五十億元，講到明唔會繼續向商界籌款。
喂，平時賺到盆滿缽滿嘅商界唔係樂善好施嘅咩？一有星光熠熠耀乜乜嘅籌款活動，都會有富翁名媛一擲千金為善最樂，然後急不及待上台獻唱《鳳閣恩仇未了情》之類嘅首本名曲，點解對於關愛基金就顯得一毛不拔呀？
功夫茶認為當中有兩大原因，第一個原因係關愛基金同其他慈善事業有牴觸，分薄咗富翁名媛嘅愛心，證明當初嘅設計有問題。至於第二個原因咯喎，商界發財不立品，捐錢去關愛基金冇得上台獻唱出風頭吖嘛，咁咪關愛變關人個關囉！
之不過咁，話唔定錯有錯着，商界對於關愛基金表現冷淡未嘗唔係一件好事。你知啦，官商勾結呢家嘢，自從前政務司司長許仕仁被捕，以及前特首曾蔭權被調查之後，已經係一種街知巷聞嘅社會歪風，若然商界非常積極咁配合政府嘅募捐，隨時又會惹來官商勾結嘅嫌疑。
點都好啦，麻煩扶貧委員會醒醒定定，唔好浪費咁大筆公帑呀！