財政司司長曾俊華以招牌式嘅沉悶聲線宣讀財政預算案，令唔少議員同高官都好惡頂要搵周公，但要數最嚴重一定首推保安局局長黎棟國，佢差唔多喺開始未夠半小時就已經進入沉睡狀態。其實黎棟國中途曾經醒一醒，但始終不敵睡魔，雙眼撐開唔夠幾秒又瞓番。
不過，黎棟國眼瞓原來情有可原，佢好坦白話自己實在太勞累，因為前日突然發生埃及熱氣球着火意外，佢要即時調配各部門人手飛去埃及援助遇事旅客嘅家屬，深夜仲同緊保安局同事聯絡，做到凌晨兩、三點鐘，所以唔係好夠精神囉。
