棄選立會 獲委政協
自由黨劉健儀出任航運交通界議員多時，去年事先張揚會轉戰地區直選後，多名政界人士都覬覦佢個議席，聽聞其中一個係同業界有聯繫嘅彭長緯。有消息更指彭長緯喺去年中突將經營多時嘅深圳租車公司結業，令人即時聯想佢係咪有意思參選。有知情人士話，彭長緯呢個舉動或者只係巧合，至於最終點解會失諸交臂冇參選，據聞底因係有人突然向西環交心，因而勸退咗佢。
雖然彭長緯同立法會議席擦身而過，但佢知足常樂嘅表現被有關方面看在眼裏，加上黨嘅推薦，佢最近接替立法會主席曾鈺成出任全國政協委員，如無意外喺一個半月後，更會由黨秘書長「升呢」做黨副主席，負責黨務工作。所以話政治多變一啲都冇錯。