新聞統籌專員鄧惠鈞（June）上任已逾大半年，適逢上星期廣東河源發生四點八級地震，香港都感受到震動，前日就有電視台播番阿June喺一九七七年報道「地震謠言」嘅陳年新聞片段。報道講述七六年唐山大地震發生後，香港不斷傳出會受唐山地震影響嘅消息，更有外國預言家喺七七年話香港會有一場史無前例咁嚴重嘅地震，整個中環會陷入維港，半山樓宇會倒塌，而當日阿June都有份現場報道呢段新聞。當然有關預言最終都冇發生到啦，而阿June就喺報道結尾話自己「喺一個好穩定嘅尖沙咀區報道」，依家睇番認真搞笑。