政情：李文達投車牌紀念先人兼做善事
運輸署日前舉行嘅農曆新年車牌慈善拍賣中，有人經過百口叫價後以三百萬零五千元投得靚車牌「1888」，原來背後投得呢個車牌嘅人就係李錦記集團主席李文達。
公司創自一八八八年
呢個數字對達叔意義深遠，唔係一般人諗到嘅發發發咁簡單，事關李錦記正係一八八八年成立，達叔特登競投車牌以作紀念，但目前仲未諗到畀邊架車用，而個車牌亦要經過幾個月處理程序後先至到手。
話說喺一八八八年，該集團創辦人李錦裳喺珠海嘅南水鎮發明蠔油，於是創立公司，屹立至今名副其實係百年老店，確係唔簡單。達叔一向飲水思源，今次用咗三百萬元競投靚車牌，雖然唔算平，但一方面可以紀念先人創業精神，另一方面運輸署扣除相關開支，會將競投所得用作慈善用途，都符合該集團嘅核心價值。