政情：立會大樓困升降機求救馬逢國遲聽預算案
財政司司長曾俊華尋日喺立法會宣讀新政府任內首份財政預算案，但體育、演藝、文化及出版界議員馬逢國就遲咗開會十分鐘，事關佢喺八樓辦公室準備搭升降機落一樓時，點知部升降機「chok」咗一下後停低唔郁，將佢卡咗喺六樓同七樓中間。雖然當時部升降機嘅電力供應仍然維持正常，但佢個心都有啲驚，於是就即時撳警鐘求救，可惜控制室收唔到佢求救嘅訊號，於是佢通知助手打電話去秘書處搵人救佢。
電源出問題
被困升降機十五分鐘後，馬逢國終於喺秘書處職員嘅拯救下成功逃出生天，雖然此時嘅馬逢國仍然驚魂未定，但為咗唔好畀人話佢遲大到，佢即刻以九秒九嘅速度趕返議事廳繼續聽預算案。佢事後話，自己平生淨係試過兩次困升降機，對上嗰次已經係廿五年前。秘書處回覆壞升降機原因係由於新大樓天台機房內嘅電箱電源出現問題，令立法會其中四部升降機全面停頓。經搶修後，所有電梯服務已經喺六個鐘後回復正常。