政情：40年前同事們送贈謝志偉捐金錶籌款
曾經喺七十年代擔任浸會大學第二任校長嘅謝志偉，最近就慷慨捐出四十年前由全體教職員賀佢做校長而送贈嘅一枚名牌金錶，供浸大校友競投，底價四十萬元，拍賣所得款項將會喺配對補助金計劃作出配對，大學籌得一蚊，政府就資助多一蚊，以支持其客座教授計劃。
當年做校長 月薪只四千元
謝志偉自爆話，佢當年做校長嘅月薪只有四千元，但這枚金錶就花咗同事們嘅不少血汗錢購買，背後份心意同情誼令佢好感動喎。至於有關金錶移交儀式，將會喺今年十月浸大校友日聯歡晚宴中舉行，由謝志偉親自將金錶送到成功競投者手上，而成功競投者仲會獲邀成為浸大基金成員添！
但從呢件事就發現原來四十年前啲人捨得送啲咁貴重嘅禮物，而當事人亦照收，相比現今社會嘅尺度，相信現今冇校長會敢收金錶禮物，而送禮者會選擇送啲物輕情意重嘅禮物都未定。