政情：鬍鬚曾暗踩盛事基金
由行政會議成員林健鋒（Jeffrey）擔任主席嘅盛事基金，近日飽受批評，除咗補貼八百萬元資助英超勁旅曼聯訪港獻技鬧出風波後，近日再被指資助嘅盛事冇盈餘，基金有出冇入。尋日財政司司長曾俊華（鬍鬚曾）宣讀財政預算案時，就暗寸盛事基金唔夠「盛事」，聲言基金應該資助更多國際級盛事，擺明係寸Jeffrey唔掂檔。
政府推出盛事基金嘅原意，本來係想資助團體舉辦大型國際盛事，一來提升香港嘅國際地位同知名度，二來吸引旅客增加收益。不過，過去幾年盛事基金資助嘅盛事，除咗頭一年搞得似樣啲外，近兩年都好少國際級盛事，只係得香港高爾夫球公開賽及邀請曼聯來港踢波。其他活動好似香港許願節、香港龍獅節等，都只係本港盛事，唔算係國際級盛事。
批評一味資助本地團體
負責批錢嘅鬍鬚曾都可能睇唔過眼，尋日終於忍唔住喺宣讀預算案時出聲，佢講到點樣推動香港旅遊業時，就借啲意話近年盛事基金搞咗好多項目，包括「龍舟嘉年華」，但佢講到出口，希望盛事基金放眼國際，效法其他鄰近地區，唔好只係一味資助本地非牟利團體舉辦盛事。
鬍鬚曾似乎驚Jeffrey唔明咩叫「國際級盛事」，專登講埋兩大例子畀佢聽，第一係新加坡搞一級方程式賽車，第二係台灣同國內經常舉辦嘅NBA籃球海外賽事，佢話希望盛事基金可以更進取，舉辦更多盛事。其實新加坡同香港都係街道多、夜景多，莫非鬍鬚曾暗示叫Jeffrey搞吓賽車，如果喺七月一號舉辦，警方就可以大條道理封路，咪唔使驚有人佔領中環？
林健鋒：基金唔負責主辦
Jeffrey就話，盛事基金只係負責審批，唔係負責主辦，如果佢主動叫某人申請搞活動，只會被人話利益輸送，佢自己都想香港搞賽車，但香港街道又窄又彎，唔適合搞，安全問題都成疑問。至於資助嘅盛事係咪要將盈餘退還畀政府，Jeffrey就話為咗增加彈性同延續性，呢項條文經內部討論後已經喺去年廢除。