中環出更：識於微時劉夢熊騸雞傾普選？
近來諸事不順嘅全國政協委員劉夢熊，繼連環捲入涉賄及妨礙司法公正案，一度被帶返廉署扣查後，早前更因「個心突然間翳住」忽然入院四日，認真該煨。不過，卓妮尋日就咁啱喺中環撞到自稱百病纏身嘅劉夢熊，同枱孖住飲咖啡嘅竟然係民主黨立法會議員單仲偕（騸雞），兩人全程密密斟，劉夢熊講到興起時更好激動咁指手畫腳，究竟兩人傾啲咩呢？認真撲朔迷離。
全程有佢講冇人講
尋日下晝三點鐘，劉夢熊現身中環置地廣場一間咖啡店，卓妮以為佢偷得浮生半日閒獨自歎咖啡啦，但十五分鐘後就見騸雞匆忙現身，兩人一見面就握晒手兼坐埋一枱，隨即邊歎咖啡邊密斟。不過，劉夢熊全程似乎有佢講冇人講，騸雞坐低唔夠一句鐘亦先行走人，留低劉夢熊負責埋單。卓妮此時趁機問騸雞同劉夢熊有咩嘢咁好傾，佢坦言二人討論雙普選，莫非係講緊佔領中環單嘢？
兩個「大纜都扯唔埋」嘅政治人物討論雙普選認真耐人尋味，騸雞後來向卓妮承認的確傾過普選大計，但就點都唔肯透露半句內容，一味話佢哋都好關注普選，更自爆佢哋其實「識於微時」。話說騸雞早喺九七年前時任立法局議員嗰陣，已經常就經濟議題向靠買賣空殼公司起家嘅劉夢熊討教，後來亦不時見面，強調見吓朋友冇咩大不了咁話。