中環出更：劉延東女兒現身青聯春茗
踏入蛇年後嘅春茗接連舉行，前晚輪到全國青聯搞新春晚宴，國內部分省市年輕才俊都遠道而來湊熱鬧，兩位全國青聯副主席陳仲尼同新世界發展執行董事鄭志剛（Adrian）親自迎賓。卓妮就喺現場發現國務委員劉延東女兒、全國青聯委員楊帆嘅蹤影，見佢同在場賓客有傾有講。楊帆目前在香港生活同工作，卓妮諗住問吓佢近況時，佢就似乎不欲多談。
前晚春茗另一個熱門話題就係政府日前加辣招壓抑熾熱嘅樓市，身兼全國青聯常委嘅霍震霆長子霍啟剛話，政府辣招對其家族集團生意影響不大，事關其集團嘅主要項目發展均在內地，但佢坦言「內地出招比香港仲辣，分分鐘唔畀地產商賣樓添呀！」莫非佢想暗示港府啲辣招唔夠力度？
鄭志剛指爺爺病情穩定
Adrian就話，其集團今年會有多個樓盤推出，對於港府嘅連番辣招，佢話要畀時間市民消化喎。問到佢爺爺鄭裕彤嘅病況，Adrian就話爺爺嘅病情已經穩定下來。
卓妮