垃圾最可怕，垃圾最可惡，呢個世界如果冇晒垃圾，不但環境清潔啲，連地球先生都會講一聲多謝呀！
之但係好可惜，人類係一種專門製造垃圾嘅生物，唔止有損市容，而且破壞生態。功夫茶睇過一條紀錄式短片，內容係講杳無人煙嘅太平洋中途島，小島原本係一個風光明媚嘅雀鳥天堂，可惜人類嘅污染能力實在太強橫嘞，強橫到垃圾漂洋過海去到中途島。結果係點呢？小島嘅小鳥誤吞大量垃圾，骾死之後屍體腐化，剩落一堆骸骨同羽毛之外，就係形形色色無法消化嘅塑膠製品。你知啦，一個印度少年漂流海上就話可以交由奧斯卡最佳導演李安拍成一套得獎電影啫，假如人類造成嘅廢物都出現「奇幻漂流」，生態隨時大災難o架。
既然垃圾咁可怕又可惡，年薪幾百萬嘅特區政府官老爺係咪應該絞盡腦汁好好處理呀？環境局局長黃錦星就話嘞，香港每日有三千幾公噸建築廢料，同廚餘數量相若，佔堆填區四分一。黃局長同各界人士討論如何減少建築廢料，得到業界一致同意與政府合作商討有關藍圖。
嗯，功夫茶想問一問黃錦星，減少建築廢料嘅具體安排究竟係點嘅呢？討論討論再討論，商討商討再商討，要到何年何月何日先至拿得出可行辦法呀？
冇錯，○六年已經實施咗建築廢料收費計劃，以污者自付嘅原則企圖減輕堆填區嘅負荷。之不過咁喎，上有政策往往下有對策，業界將建築廢料送去堆填區要收費吖嘛，佢哋為咗節省幾個臭錢，咪亂咁棄置荒山野嶺甚至鬧市街頭囉。好似大角咀杉樹街咁吖，經常有大量建築廢料傾倒，行人通道甚至上落客貨車位置淪為垃圾崗。又好似旺角登打士街成日都有建築廢料，不但影響市容，更加造成阻塞，街坊街里當然不滿官老爺執法不力啦。
環保署淨係識得強調，非法棄置建築廢料屬違法，首次定罪最高可判罰款二十萬元及監禁六個月，第二次或其後定罪最高可被罰款五十萬元及監禁六個月。問題係，若然執法者唔去緝拿犯法者，有法等於無法啫，吓話！
除此之外，新界郊區都係重災區，例如荃灣川龍村附近不斷有人傾倒泥頭，荒地之上甚至出現可以致癌嘅建築廢料石綿，唔止村民係受害者，連漁護署列為罕見品種嘅苧麻珍蝶都可能遭殃o架。
其實講到尾，如果要減少建築廢料，有一種垃圾係要盡快清除嘅。呢一種垃圾普遍存在於官場，例如以往有名你叫「氣候逃犯」嘅前特首曾蔭權，任由官場垃圾阻住地球轉，減少建築廢料係空口講白話o架咋！