沙田區議會田心選區補選競爭激烈。民主黨候選人丁士元喺隆亨邨掛起一幅九米長嘅橫額，被人投訴涉嫌違反選舉宣傳品規例後，尋日又被指「出術」借民建聯立法會議員陳克勤嚟宣傳。網上流傳一幅相片，內容係有張寫住「支持丁士元」字樣嘅橫額豎立喺克勤嘅橫額前面，但又遮剩克勤個頭，令選民誤會克勤支持對手參選，懷疑此舉有心屈票。
克勤批評，對手呢個做法係誤導選民，認為想贏就唔好出埋啲「哪渣招」。佢仲話，事後已即時向選管會投訴。丁士元就話，今次純屬同事無心之失，佢事後已同克勤「沙冧」。今次補選候選人還包括公民力量潘國山、人民力量林匡正及報稱獨立嘅蘇佩琳。
