政府日前推出「加辣招」打擊樓價，包括多項首次針對工商舖嘅措施。人稱怪醫嘅醫學界立法會議員梁家騮尋日自爆，自己可能係「加辣招」嘅得益者，因為佢喺中環太子大廈嘅診所就嚟要續約，聽聞業主喺「加辣招」推出後，都唔敢獅子開大口，最後可能加幾成租就算數，大家好嚟好去。
怪醫喺一○年離開公立醫院轉為私人執業，同年年中為診所簽訂租約，當時金融海潚嘅後遺症仍未完全消退，市道未算太瘋狂，所以租金只需九十蚊一呎，成間診所差唔多月租八萬幾蚊，仲叫負擔得起，但估計到年尾續約時，業主肯定會要求加租，最壞打算係會倍倍聲咁加。
好彩政府最近推出「加辣招」打擊工商舖炒風，連帶遏止埋工商舖嘅租金升勢，怪醫探聽過業主嘅最新口風，相信最多都係加幾成，否則做多十幾次手術都唔夠交租。
談及內地水貨客來港搶購奶粉問題，擁有一對年幼仔女嘅梁家騮就透露，佢個大仔同細女都係食開一隻相對冷門嘅日本奶粉，並唔係水貨客嘅搶購對象，貨源都尚算充足，唔需要為撲奶粉而搞到周身唔得閒喎。