政情：蘇澤光滑雪平靚正
農曆新年前後係出外旅遊充電嘅旺季，貿易發展局主席蘇澤光（Jack蘇）滑雪多年，今年揀咗距離北京三個鐘車程嘅新滑雪場試玩。Jack蘇話，佢並非第一次到內地滑雪，而今次去呢個滑雪場又新又平，唔使每次都排隊等二十至二十五分鐘之餘，價錢都只係日本滑雪嘅一半！
力撐貿發局價值
講開Jack蘇，不得不提貿發局嘅工作，事實上佢亦十分上心，不時都有留意外間對貿發局嘅睇法，包括最近有兩篇評論文章就講到貿發局嘅存廢問題。Jack蘇開宗明義力撐貿發局話，雖然大家都有言論自由，但唔應該譁眾取寵，又指外界「叫貿發局關門」嘅講法好唔公道喎。
對於有評論話本港已經冇工業，貿發局或冇存在必要，Jack蘇坦言，貿發局唔係工業發展局，凡係有利本港發展，貿發局都會引為己任，好似物流、電影、資訊科技等多個範疇，貿發局都大力推廣，之後貿發局亦會帶領一百三十人去緬甸睇吓有乜商機。
佢笑言，貿發局呢一類組織，好難連牛頭角順嫂都會識，所以只能自我檢討，睇吓點樣可以做得好啲喎。