政情：陳雲生踩錯場（火羅）爆
中電日前公布業績話未來幾年要大幅加電費，民建聯屯門區議員陳雲生同支部成員就食住個勢頭，除咗杯葛尋日朝早中電嘅新春酒會外，下午又拉大隊去中電總部抗議，大喊「強烈要求中電擱置加價申請」、「市民慘慘慘」等口號。原本個請願係威係勢，只可惜佢哋唔知碇，竟然去咗旺角亞皆老街舊中電總部，認真（火羅）爆。
其實中電喺去年中已將總部由旺角亞皆老街遷往紅磡海逸道，但陳雲生一行人尋日去到舊中電總部時，都仲未發覺去錯地方，但當眾人嗌完一輪口號見冇人出嚟接信，先至急急打電話去中電搵人，發覺大家喺唔同地點等候。中電方面唔敢得失啲政黨，於是特別派職員由紅磡新中電總部「飛的」過旺角舊總部接收請願信。
摸門釘繼續死撐
陳雲生就解釋，話中電將來會喺舊總部地皮發展房地產，正正切合佢哋要求中電應該將部分地產收益撥入「電費穩定基金」嘅建議，所以先至去中電舊總部請願喎。不過，點解佢哋事前又冇約定中電職員去舊總部接信呢？究竟係佢哋去錯地方仲死撐吖，抑或中電職員搞錯地點呢？