政情：謀擴功能選民 政制局頭痕
影響二○一七年特首選舉及二○二○年立法會選舉嘅政改方案，相信係未來兩三年嘅政治焦點，負責處理嘅政制及內地事務局局長譚志源一直非常頭痛，因為制訂一個泛民主派與中央同樣接受嘅方案，幾乎係不可能嘅任務。早前佢開始接觸唔同嘅功能界別議員，商討如何擴大功能界別嘅選民人數基礎，但好多議員都大潑冷水。
為咗整大功能界別個餅，據聞譚志源同副局長劉江華喺新年前已經靜靜雞、單對單同個別功能界別議員會面，諮詢對擴大功能界別嘅意見。獲諮詢嘅保險界陳健波話，佢冇咩建議畀到政府，講到明希望保留功能組別，而且唔想保險界選民擴闊到全港八萬名保險從業員都有得投票，聲言此舉唔係好事。
林大輝閂定後門
不過，政府想增加功能界別嘅認受性，又可以點做呢？陳健波就話，現時得百幾間保險公司係選民，數字上的確係少啲，所以佢建議中介人公司都有得投票，咁做選民人數最少都增至三千幾至四千人，起碼叫有進步喎。
本身係工業界（二）嘅林大輝，雖然未同譚志源食飯傾政改，但佢已閂定後門，表明反對畀所有工廠工人都成為該界別選民，事關好難界定邊啲係工人，加上工人嘅流動性好大，今日做工廠，第日分分鐘係運動員，咁選舉事務處嘅行政費咪好高囉，倒不如呼籲多啲廠商登記做選民仲實際喎。
搵學者傾偈收風
其實作為功能界別議員，又點會咁笨贊成政府擴大選民人數呢？因為擴大到好似地區直選，自然好難控制選民嘅投票意向，所以譚志源約班功能界別議員商討，同煲無米粥冇咩分別。
咁啱法律學者戴耀廷又醞釀喺明年舉行「佔領中環」行動，所以譚志源除咗約見唔同政黨議員外，近期都開始約班學者傾偈，一來聽吓佢哋對政改有咩睇法，二來感受吓班中產學者支唔支持「佔領中環」，幫政府做定防風措施，睇怕譚志源未來一年都係有排忙喇！