中環出更：英祿忙掃貨 無暇見阿哥
前泰國總理他信之妹、泰國首位女總理英祿（Yingluck Shinawatra）前日抵港，展開兩日旋風式官方訪問，尋日朝早應邀到禮賓府同特首梁振英（CY）進行雙邊會談，並簽訂合作協議。英祿日前先透露國事行程緊密，今次訪港未有機會同流亡海外嘅哥哥他信見面，但話口未完，卓妮尋日喺金鐘遇到英祿帶同囝囝等家人，喺保鏢隊伍護駕下浩蕩出巡掃貨，唔通英祿口中嘅「國事」就係行街Shopping？
英祿見完CY後，連衫都唔換，就帶同家人去金鐘太古廣場掃貨，向來形象高貴嘅英祿以髮夾束起部分頭髮，配以一襲紫色套裝出巡，簡單利落、明艷照人，「泰國華人第一美女」果然唔係浪得虛名。貴為國家元首嘅英祿，即使低調行街都有至少十名保鏢隨行，本港警方更安排多名G4（保護要人組）遠距離護航，相當大陣仗，沿途吸引唔少途人圍觀。
時裝零食樣樣啱
卓妮見英祿一行人首先去百貨公司選購旅行篋，已為人母嘅英祿未有掛住掃貨而忽略囝囝，更不時搭住囝囝膊頭並排而行，沿途有傾有講，但囝囝似乎鍾意手上嘅遊戲機多啲。不過，英祿始終難敵女人天性，睇完旅行篋同耳筒配件後，就旋即走訪幾間女裝名店，更喺一間走高貴路線、連立法會議員葉劉淑儀都係粉絲之一嘅名店買咗四件貨品，相信埋單至少幾萬元。
英祿掃完女裝依然意猶未盡，隨即再到商場超市搜購水果同零食，更對日本福岡出產嘅士多啤梨情有獨鍾，一口氣買咗兩盒，果然識食。英祿亦對日、韓零食相當有興趣，買咗唔少朱古力曲奇等零食添，唔知係咪買嚟氹囝囝開心呢？直到大約五時許，卓妮見英祿等人離開酒店，並向機場方向駛去，另外仲有架大貨車做先頭部隊，莫非載滿咗戰利品返泰國？
卓妮