最低工資委員會舊年經過半年檢討拗到面紅耳熱後，成班委員幾經辛苦先達成共識，將個水平由廿八蚊提高到三十蚊，個個事後都話呢個任務吃力不討好，任期完咗都唔做喇。今屆委員會任期仲有幾日就完，政府好快就公布新一屆委員嘅任命，聽聞勞工界委員幾乎換晒人，不過最重要係主席翟紹唐繼續留任。
委員會依家三名勞工界代表分別係職工盟創辦人劉千石、勞聯會務顧問李啟明同工聯會前立法會議員鄺志堅（大狀），三個都做過臨時最低工資委員會，仲過渡做埋第一屆最低工資委員會，但啟明叔同大狀都齊齊唔撈。啟明叔因為年紀大，係時候退下火線，政府就游說咗勞聯前立法會議員李鳳英接任。而大狀就話自己已經離開咗工會所以唔做，據聞工聯會推舉咗秘書長黃國接任。
至於商界就聽聞原班人馬繼續做，當中最耐資格就係零售管理協會主席麥瑞琼，如果佢繼續做就連做三屆。學者方面，聽聞張仁良因為有機會做教育學院校長，所以未必留低。